Ang kahusayan sa Ingles, lalo na’t may banyagang impit na tunog Amerikano o Inglatera ay itinuturing na nakatataas at nauugnay sa estado sa lipunan.  Ito rin ang ginagamit na pagkilala kung ang isang tao ay laking lungsod o probinsya…malimit na pinagtatawanan ang probinsyanong mali ang pagbigkas ng mga salitang Ingles o di kaya’y mali ang kanilang gramatika.  Ang kaugaliang ito ay nadadala ng mga Pilipinong dumadayo sa ibang bansa, kung saan may diskriminasyon sa pagitan ng mga bihasa sa Ingles at sa mga may impit na tunog probinsya. 

 

Ipinagmamalaki ng mga migranteng Pilipino ang kanilang katatasan sa lenggwaheng Ingles at madalas nilang banggitin na Ingles ang pamantayan ng komunikasyon sa kanilang inang bayan…isang aninag ng mataas na karunungang magbasa at magsalita ng Ingles ng Pilipinas kumpara sa ibang mga bansang kabilang sa Timog Silangang Asya. Ang kanilang kagalingan ng abilidad na makibagay sa bagong kultura at lisanin ang Pilipinong pamamaraan ay kinikilala na katatagan sa panig ng pagiging Pilipino.  Ngunit katwiran ng iba na ang mga ito ay rason lamang para sa malakas na pagnanais na maka kalas ang Pilipino sa sariling pagkakakilanlan at makilalang maka-Kanluran.  Ang minimithing makatira sa banyagang lupang inaasam ay isang pangarap na sa wakas ay nakamtan na.